Di daxuyaniya ku ji teref Ofîsa Ragihandinê ya Hikûmeta Xezzeyê ve hat dayîn de weha hat gotin, "Artêşa îşxalker a îsraîlê di Eyda Remezanê de jî êrîş, qirkirin û paqijkirina etnîkî ya li dijî gelê Filistînê didomîne."

Di daxuyaniyê de hat ragihandin ku li Nuseyratê 14 kes di şeva eydê de hatin qetilkirin û weha hat gotin, "Xezzeyê bi xemgînî û êşeke mezin Cejna Remezanê bi şehîd û birîndaran pêşwazî kir. Êrîşên îşxalê yên li ser malan û saziyên sivîlan berdewam dikin.”

"Rêveberiya Emrîqa û Serokê dewletê Joe Biden ku hê jî ronahiya kesk dide îşxalê û desteka çek û cebilxane dide, ji qirkirina hêzên îşxalker re mesul in."

Di daxuyaniyê de hat destnîşankirin ku balafirên şer sibeha eydê li esmanê Xezzeyê difirin û êrîşên xwe berdewam dikin.

Di daxuyaniyê de hat diyarkirin ku siyonîstên îşxalker xelkê Xezzeyê, jin û zarokan ji pîrozbahiyên eydê bêpar kirin û şahiya eydê jê girtin. (ÎLKHA)